Serafe I - Genesis Im Dezämber 2025 hani mau wider dr aujährlech Brief mit Izahligsschiin vo üsere Lieblings-Gebühreerhäbigssteu übercho. Sehr geehrter 3506 Bitte zahle. Freundliche Grüsse Serafe Es isch nie agnähm, aber me biisst ohni z Murre i dä suur Öpfu u zaut dä Batze fürne aständige Sörviss Pübligg. I mim Fau leider mit paar Täg Verspätig, Äsche über mi Gring, wäg däm tragi d Bünzlimedallie ja o ohni Eduwyss-Sonderabzeiche. Serafe II - Exodus Item, paar Wuche speter, amne Mänti Abe im Februar, ligt scho wider sone huere Wusch Autpapier im Briefchaschte: Hallo 3506, bitte nomau glich viu zahle (drühundertirgendöppis Franke) MfG Serafe Da bini ds erste Mau liecht gnietig worde (no nid z’grächtem hässig, eifach langsam rumpusuurig), aber me kennts: wo gschaffet wird passiere Fähler. I däm Fau vilech sogar bi mir? Muetmasslech im Zämehang mit däm chlinere administrative schwarze Loch, wo sech spontan bi mir im Büro ufta het? " Macht nüt, da chame sech wäger no am Wuchenändi drum kümmere. Vilech ischs ja o nume e Mahnig, sie können diese als gegenstandslos betrachten… ", hani mer dänkt u die zwöiti Rächnig zu de offene wüchentleche Pendänze abgleit - nid laminiert igordnet, wine bluetige Afänger, isch ja no nid abgschlosse. Serafe III - Levitikus Aui, wo aus chliini Goofe nid ufe Gring gheit si, hei Tschechows no nid abgschlossni Pendänz sofort erkennt: Wider drü Täg speter (es het no nid mau bis am Friti glängt, tami nomau!) grabi e witere pägguhaarige huere Serafe-Chueplätter us dr Post. Dir verstöht sicher: da hets mer dr Nuggi scho mit dr Gwaut vo über 9000 Sünneli usegjagt, bevor dasi ds Couvert überhoupt ha ufgschrisse. Brieföffner chasch i so Situatione eh grad vergässe, am liebschte wäri mitemne Zündhöuzli drhinger (gottseidank das i’s vor Rächnig wider furt ha gno). Fürne churze Momänt hani so rot gseh, dasi äuä vo blossem Oug e thermografischi Wärmedämm-Analyse vor Geböidehüue hät chönne mache. Nachdäm dasi mini Gfüu vo mittuständiger Machtlosigkeit dür dä wärtlos huere Fötzu dürebrätschet ha, het mi schlussamänd nume es Chacheli Ricola-Tee gnue chönne calmiere, zum mi derä unerhörte Behördewiukür z steue: Sälü Kolleg 3506 Dises Mau bitte no rückwirkend für vier Jahre (2022-26) zahle! Beschte Priis isch tuusigdrühundert Stutz. OK? OK. Ciao. Ciao ciao. xoxo ^sErAfE^ " Was si de das für quergvögleti, himulinggi huere Schnäbizägge?!! ", hätt äuä öpper dänkt, wo nid so nätt isch wie mir hie aui. Serafe IV - Numeri Ig persönlech kenne zum Glück aui Seven Sinking Steps u cha drum, o we dr Biimer mygottstüüri mau nid wörkt, e chüele Chopf bewahre, you Driimer, you. U so hani auso im Kontaktformular sehr nätt u aständig gschribe ob sie sech bitte schriftlech (mehrfach betont: schriftlech ! Wiu nume so zeuts när vor Gricht, säge immer aui…) mit mir chönnte i Verbindig setze; zwäcks Briefkontakt, gägesitigem Kennelehre, lockerer Fründschaft u vilech ligt amänd no e Ratezahligsveribahrig drin? Drufabe hani lang nüt ghört, bis öppe zwöi Wuche speter e vierte Brief i d Hütte gflatteret isch: 3506, digga Wir hatten äben schampaaar Mühe gehabt, euch telefonisch zu erreichen, ob dir ächt - sitsoguet - könntet zurückläuten? lol. Serafeeeeeee e e e e e U das isch dr ganz Brief gsi (natürlech nume sinngemäss, nid wortwörtlech). Ei Satz, per Post. Jaaaa waaaas itz??!!! Da gibi äxtra ke Telefonnummere a u bitte mehrmaus usdrücklech, aber höflech, um Ufklärig vo mine Frage im schriftleche Verchehr per E-Mail oder Brief u när chöi si mi telefonisch nid erreiche, di elände Traliwatsche?! Wieso äch?! Immerhin hei si mi schriftlech kontaktiert, so wie vor mir gwünscht. I ha mi churzum entschide, mini Närve z schone, füre Momänt no grad nüt z mache u die Aglägeheit mim Zuekunfts-Ig z überla. Serafe V - Deuteronomium U so chöme mer, übere eint oder anger Umwäg, im März 2026 a: Es isch Ändi Monet, dr gneigt Bünzli (aka Zuekunfts-Ig) erlediget sini Korrespondänz u macht dr Monetsabschluss im Beggsio. Aber oh Schreck, was gseht sis ungschueute Oug? Tribe sech da öppe no offeni Verbindlechkeite i de Passiva ume?! Gschider mau alüte zum frage wie das itz usgseht mit dene Ratezahlige! 1 Minute Warteschloufe, e nätte Mönsch nimmt ab, i schiudere mis Problem.
- « Aso, wüsset Sie, da händ mir Ihne öppis gägeverrächnet, Sie händ ja scho zahlt, gsehn ich da, aber da musi schnäll goge nahfröge wiäviil no offe isch und ob mir Ratezahlige akzeptiered » 2 Minute Liftmusig
- « Sind Sie no da? Sehr guet! Aaaalso, es isch folgendermasse: mir händ das agluegt und Sie schulded ois no sibenezwänzg nünzg. » Wiviu?!
- « Sibenezwänzg nünzg, für de Juli 2026 » Dir meinet, Monetsratene à je sibenezwänzg nünzg u die ersti isch im Juli 26 fäuig?!
- « Nääi, d Gsamtforderig belauft sich no uf sibenezwänzg Franke nünzg, ein Monets-Ateil .» Hääää? Chöit dir mr das bitte schriftlech gäh?
- « Kääis Problem, ich schick Ihne grad es Mail. Danke, adee. » Merci, adieu U tatsächlech hani füf Minute speter es E-Mail übercho, mitere aghänkte Rächnig (woni natürlech sofort zaut ha). Ds beste a dere Rächnig: i ha weder am 5.3. no irgendwenn süsch jemaus i mim Läbe 1005.- a d Serafe überwise. Di Sieche hei doch Lagg gsoffä! Au di Ufregig - wäg sibenezwänzg nünzg. Z läng;nid gläse: über 4 Mönet verteilt 4 Briefe mit Forderige über 1400.- vor Serafe übercho. Einisch aglüte, nume no 27.90 gschuldet submitted by /u/3506
Originally posted by u/3506 on r/BUENZLI