Egal wie die ganz Gschicht denn am 14. Juni ussechumt, bruchemer unbedingt en schlaue Strukturwandel i dr Arbetswelt. Hützutag schafft afach kan Schwiizer meh i de weniger bezahlte aber Systemrelevante Jobs. Deswege min Vorschlag: mir tüent afach wie bi neme Kueche d’Lüt unterhebe in Teig bis es passt. Also als erschtes schaffemer jedi Art vo Studium ab, sowas hät i Form vo Bänker und em andere Gschmois nur üs Stürzahler uspresst wie Zwätschge. Kei Studium, ka Arbeitslosi Gschichtslehrer und sobald mir kei Studium meh annerkennet chömet au ka Expats meh is Land. Schlömer das Problem au no. Will keine vo dene chan was handfeschtes sondern händ nur so chomischi Linkedintitel. Politiker wo studiert händ müend sofort e Lehr nohole, wo sie nöd verkürze chönt, damit sie a jour sind zum Volk. UZH und die andere chönt sich denn meh ufd Entwicklig vo Drohne konzentriere. Denn tüemer mit Recheschieber usrechne wo mir welli Lüt unterhebe müend. Da wir Landwirt eh scho dure füettere tüent mit üsne Stüre, schaffemers denn au die paar CS Bänker als Spargelstecher döte iizarbeite und en aständigere Lohn zahle als das Arbetslosegeld wo sie jetzt überchömet nochdem sie vo de UBS ussegschmiese worde sind. Wenn mir scho dra sind, chöntemer denn e klieni Gebühr uf Zuckerrübe erhebe, denn würdemer no ad Energy Drinks vo RedBull mitverdiene, i platzier das mol nur als Gedanke. Sobald mir quasi Böttom Öp a Landwirtschaft gsicheret händ, auso Grundversorgig chumt Infrastruktur und Handwerk. De massive Fachkräftemangel lösemer döte ganz afach, die wo gern i de Natur und dr Luft inkl. natürliche Reifeabrieb schaffe tuet, schafft a Baustelle fürs ASTRA. Die wo gern ihri Händ isetzet aber nöd gern überfahret werdet, a allem anderem. Die wo gern tüent Autofahre chönt Handwerker werde. Die wo paar Zahle zämmerechne chönd und Handwerklich nöd begobt sind (wie nich) dörfet sich en Stehpult mit oder ohni Stuehl schnappe und entweder Bozeichner, Ingänieur oder direkt Boleiter werde. Dr Boleiter beinhaltet en Geschwindigkeitslauf in Börnout aber nochher dörfmä sich bim Spargelsteche erhole ufem Land. Für die andere Fachplaner findet sich sicher au en Verteilschlüssel: Häsch gern Sims gspielt? - Architektur, Weisch was Strom isch usserhalb vo neme Flussbett? - Elektro, Schafsch gern mit Metal - Konstrukteu… obwohl die sind momentan alli Arbetslos oder uf Kurzarbet, mä findet aber sicher au für die was. So sobald das au alles stabil lauft chumt Pfläg. Döte chan mä sich denn bim Arzt de Zuestand vo sim Rucke usrechne loh und denn wird mä entweder fürd Chinderpfleg, Mittelalterlichi Pfleg oder Geriatrie iiplant. Dr Pflegeinitiative wird denn dadurch schnell no umgsetzt, will mä de zueständige Kantön wo sich weigeret förschie zmache jeglichi Form vo medizinischi Behandlige dur Quarkwickel ersetze tüent. Dafür sinds gueti Schwiizer Quarkwickel, die beste die vo dr Migros. Zu aller letscht chömet Lehrer. Will mir i Zuekunft ka oder halt sehr wenig Chinde werdet ha, hanich mir denkt, dass mir do am wenigschte müend mache. Nur Lehrer dürfet nüme dr Job wechsle und sind uf Lebesziet a dem Bruef bunde. Wer wechsle wot, dörf nur Fachrichtig wechsle. Werke, Sport und Huuswirtschaft wird eimol jöhrlich währet so öffentliche Kampfspiel zwüschet dr Kantön usglöslet. So dala, das wäret globs alli wichtige Arbeite gsi. Sache wie Putzkraft, Schwarzarbeit ufem Bau, LKW-Fahrer, Schweisser, Bestatter, etc. die schlüsslemer denn nachisnah uf. Mir chöntet dr Bundesrotjet au nutze zum üsi Uslandschwiizzer wieder zruck zhole mit de Operation: “Liecht forciertes Heimweh” falls es zwenig Freiwilligi hät. Nachholtigkeitsinitiative+PLUS Und währet mir die Arbetskräft mitels dem zruckklaute Saurer Unternehme durs Land fahret, müemer denn no, jede Schwiizer pro Kanton begrenze. Will mä muess afach ehrlich sie, die Zürcher bi eus i St. Galle, mit ihrem Aspruch uf bessere Lohn, Kultur und so moderni Fachbegriff wie Frauestimmrecht oder Scheidigsrecht, das isch üs afach zu futuristisch. Dass sie üs dr Wohnige weg nehmet isch aber nöd eso schlimm, mir händ jo eh gnueg so Zürcher Villene hie mit 30m2 ohni WC i dr Innestadt. Min Vorschlag 10 Mio + 1 Mio fürd Spatzig vo dr frewillig zruckbrochte Uslandschwiizer verteilt uf Kantön noch Flächi (mit Berge und Seen), Tunnel baue hilft dr Bauindustrie und mä chan au döte drin wohne. Typisch Schwiiz machemers denn aber je noch Kanton und Gmeind mit Sonderregelige und wenns am Afang nöd ufgoht tüänd mer dur de Finanzusgliech “Flüchtlingslager” ussserhalb vo Züri, Luzern, Zug und Genf ufstelle und finanziere. Also sie werdet quasi Selbstfinanziert sie. Es wird döte a dr Lüt a nünd vo bodeständiger Schwiizer Kultur fehle: Wöschkuchi, Ruheziete, schöni Natur, Nochbuure, Internet mit Kupferkabel vo dr PTT, kei Chinderbetreuiig, Globi Animateure i Kostüm und je noch Kanton eigeter Eigeheite. Kei ahnig i chenn mi jo nur mit Brotwurst ohni Senf us, alles ab dr Sittere isch ennet dr Grenze. Und will d’See döte eh am Kanton ghöret chöntemer die Lager döt anestelle. So Pfahlbaute, wieder was typisch urschwiizerisches. Säget denn au d’Awohner nöd nei, will Baugrenze ighalte wird. So was haltet ihr so vo dere würkli u huere mega gueti Idee? I mag euri Idee ghöre däzue. submitted by /u/BezugssystemCH1903
Originally posted by u/BezugssystemCH1903 on r/BUENZLI