Die 13. AHV-Rente entspricht ja eim Monet meh Rente also 1/12 = 8.33% Persönlich find ich das kei Lebensveränderndi Erhöhig. Profitiere düend die, wo scho d Max-Rente hend und die wo en tüüfi Rente hend, müend wahrschindli trotzdem nu Ergenzigsleistige afordere. Aaaaber mit dene 8.33% chönnt mer kommendi Generatione rette. Lönd mich erchläre: Wenn mer sich die reine Geldleistige (aso Geld wo de Rentner geh wird) fu de AHV im Jahr 2024 aluegt entspriched 8.33% = CHF 4’206’733’300.-. det hets zwar nu kei 13ti AHV-Rente geh aber min Punkt chani trotzdem klar mache. Wür mer jetzt das Geld (aso die 8.33%) jedem nüü geborene Chind “schenke”, gäbt das im Jahr 2024 pro Chind CHF 53’756.05. Machemer rundi 50’000 Franke drus. Jetzt isch mini geniali Idee, dass mer die 50’000 Franke fu Alter 0 bis 65 alegge würdi bzw. de Staat legt das Geld ah und wird zwangsgspared. Mer chan das Geld vor Alter 65 nöd hole. Mitere durchschnittliche Rendite fu 5% pro Jahr, gäbti das mit Alter 65 sage und schreibe CHF 1’280’839.- (über 1.2mio!). En echt guete Batze Geld. Wenn mer das bis Alter 100 (aso uf 35 Jahr) verteile würdi, wäred das rund 36’600.- pro Jahr. Also düütlich meh als die maximali AHV-Rente und das bis Alter 100 grechnet. Und das mit nur 8.33% mini Dame und Herre. Die normale 12 AHV-Rente bechämt mer ja quasi nu “on-top”. Jede Schwiizer i jedem Alter müesst jetzt bereit sii, uf 8.33% AHV-Rente z verzichte. Defür hetti jede zuekünftigi Schwiizer 1.2mio meh im Alter z guet. Die Zahle chönder alli selber nachrechne. Statistike sowie AHV-Usgabe findet mer easy online. S Geld chönnti mer i Schwiizer-Fonds investiere. Da demit wür mer Schwiizer Firmene helfe. Wenn öpper vor Alter 65 stirbt, gaht das Geld zrugg in AHV-Topf. Es isch fu afang gschenkt gsi fum Staat und wird drumm au wieder retour gfüehrt für Unvorhergesehenes. Sozial und fair isches au, will egal öb Mah, Frau, arm, riich oder sustwas bechunnt die 50’000 Franke. Hauptsach Schwiizerpass bi Geburt. Kurzum : In Zuekunft hetti jede 1.2mio meh fürs Alter zum bruuche, defür müesstet alli jetzt lebende Schwiizer uf 8.33% AHV-Rente verzichte im Alter. submitted by /u/Buuuni
Originally posted by u/Buuuni on r/BUENZLI