Hee ka öb das de richtig Subreddit esch, fühlid euch frei, mer en bessere vorzschloh, fallser eine kennid :) Ech frog jetzt gliich mol do, es esch sehr vell Text, aber ehr chönd au rasch de Schluss lese ond denn entscheide öber eu de Rest gebid 😅… D’Situation esch wie folgt: Ech han im Summer 2020 miini Lehr (Kaufmann EFZ) abgschlosse, ha es halbs Johr spöter d’Winter RS gmacht ond denn vom Sommer 21 bis im Winter chli “Jöbblet” bevori im Februar 22 mit de “Maturitätsschule für Erwachsene” (MSE) ahgfange han. De Vorkurs het im Februar gstartet ond denn abem Juni s’“richtige” Semester. Abem Sommer hani denn au 50% ahfo schaffe ond mech abgseh vode Wohnig selber finanziert. Im ca. November 2023 bini denn au uszoge ond ha mech ab dem Ziitpunkt quasi ganz selber finanziert, (bzw. eher dörekämpft mitem 50% Lohn woni gha han). Im Sommer 2025 hani das ganze denn Abgschlosse ond s’Maturazügnis erhalte. Soo tued mer leid för die vele Informatione, aber das esch wichtig förs Verständnis vode Situation. Wichtig esch z’erwähne (ond das esch denn vlt au usschlaggebend) dass miini Eltere ih de Ziit vode MSE no chinderzuelage becho hend (ca. 200 franke im Monet, wo sie mer öberwiese hend). Jetzt hani es Johr Pause gmacht, (resp. Schaffe ond Reise) ond fang bi de ETH Züri im September ah mit Maschinebau. S’Gsuech förs Stipendium hani scho vor mehrere Mönet iihgreicht. So, welli wie erwartet no nüt ghört gha han onds kinda relevant esch för miini ganz Wohnigssituation (bin inere WG mit Kollege zLuzern ond möcht do bliibe) hani dene mol ahglüte ond die hend mer denn de Bscheid gäh wie im Titel beschriebe. Also, miini Eltere wohnid sitt 2 Johre z’Brunne… well s’Amt jetzt behauptet ech siig ned “2 Jahr lang unabhängig” sett ech jetzt s’Gsuech bem Kanton Schwyz stelle, wells offebar öber d’Eltere lauft. De Grund för das Ganze esch, well ech während de Ziit vode MSE (Vorkurs hends mitiihberechnet) theoretisch au Stipendiebiiträg z’guet gha heig etc. (Det hani eifach en Teil vode usbildigschoste öbes Sipendium loh laufe loh, aber kei Uszahlige). Ech ha vom Telefon aber au ned gaanz checkt was sie gmeint het, jedefalls wird die “unabhängigkeit” wäge dem ned zellt ih dere ziit. So, well miin Vater ned schlecht verdient (jetzt au ned crazy, aber halt so mittleri Führigsposition) bini mer zimli sicher, dass das Gsuech z’Schwyz abglehnt wird (oder minimum gids ned vell). Miis Mami bezieht IV, well sie Arbeitsunfähig esch. De grösst Witz ah dem Ganze esch au, dass das offebar scho sittem Juni entschiede esch, sie mer aber verhängt hend die Freigab im Portal zgäh, dassi das gseh, weshalb ech jetzt au no mega spot drah bin wennis in Schwyz ahfroge. Ond en Brief hani au nie öbercho… Schluss: Ech bin grad chli perplex, welli jo sitt 3 Johr uszoge bin, en Lehrabschluss han, praktisch kei Geld erhalte han vode Eltere, no nie in Schwyz gwohnt han ond jetzt gliich als “abhängig” iihgstuuft wird ond das ganze öber d’Eltere lauft. Miini frog ah die wo so wiit gläse hend ond vellecht au bitzli druuschömid esch: Macht es Sinn, be dem Ganze Ihspruch z’erhebe, quasi z’Argumentiere dassi sittem November 23 unabhängig bin, well soundso Gesetz xy oder machts meh Sinn, grad z’Schwyz ahzfroge. D’Ziit presst jetzt halt ond nebebii so vell Arbeite wie’s bruucht zom Mieti zahle ond co. wird schwierig bemne Vollziitstudium ahde ETH. Ech bedanke mech för alli Tips, Inputs etc. PS: ech kenne de Sub bitzli, also för alli wo mer wennd säge “hee besch en Volltrottel” ond kei Inputs gäbid, sparid eu d’Ziit ond scrollid eifach wiiter, merci. submitted by /u/yourgymbuddy
Originally posted by u/yourgymbuddy on r/Switzerland