Jä näi, jetzt langets aber langsam. Bin ich de einzig oder fallt no öber anderem uf, dass die schiiss E-Scooter en Füehrerschiin brüchtet. Be üüs im Dorf rasets inzwüsche durch jedes chleine Wägli wo explizit nur für Füessgänger dänkt isch mit gfühlte 120 Sache. Debih no s’Handy in de Hand, die siebe Kollege ufm Rucksitz und wenns Nacht isch no s’Liecht, wo au e zweiti Sunne mit Retinaverbrennigsfunktion inklusive sih chönnt, nid ufd Stross grichtet sondern voll is Gsicht bländend. Die fahrende Mordversüech findets denn au no normal, ufm Hinterrad versueche z’fahre, übere Krüzig oder de Schuelhof mit spielende Chinder. Hets dene eigentlich ihnegschneit oder welli Chromosomevariante het doh im Tik-Tok Brainrot letztändlich ganz de Geist ufgäh und isch für das hirnrissige Verhalte verantwortlich. Früener hämr jo au unseri Töfli gha und sind z’schnell dure Dorfkern grast, aber ebe uf Strosse oder abglägene Parkplätz wos nid uffallt. Und d’Gsetzgäbig schint sich au nid drzum z’kümmere. Die möcht lieber das au schön jedes Vögeli sis gezwitscher am Sunntig zerst mitm blaue Formular 2B rächtzitig amäldet (“nei sie, Frau Amsel, nid s’hellblaue, s’azurblaue, isch doch logisch und usserdäm isch jetzt 6 ab 9ni und de Schalter bereits zue, bitte beachtet sie doch d’Öffnigszite uf de Gmeind be üs, die sind nämlich nur jedes zwöite Schaltjohr am Zistig am 29. Februar vo 9ni bis 5 ab 9ni”). Gopferdori, wo isch de Dorfpolizist wenn me ihn mol brucht, wo isch de Dorfalkoholiker wenn er mol welchne im Wäg stoh sött, wo isch eigentlich de gsundi Menscheverstand vo dene Saugoofe blibe? submitted by /u/Other_Team_2488
Originally posted by u/Other_Team_2488 on r/BUENZLI