Ich mues mer churz Luft mache, suscht bruuchi dänn grad e doppleti Ladig Aromat diräkt uf d Zunge. Edit: Bude het au Dütschi standort, also schaffemer mit Dütsche. Ich schaffe imene Bereich, wo mer laufend nöii, massgschniidereti Lösige erschaffed. (Und ja, ich schufle au kei Chiis uf em Bau und bi sälber bizeli Bürogummi – aber mir baued konkret Produkt und müend de Chopf anehebe, wänn öppis nöd verhebt, also kein McKinsey Folie schubser). Alli reded ja immer vo dere legändäre «tüütsche Effizienz». Am Flüüssband mit 500 Siite DIN-Vorschrifte mag das funktioniere… Aber d Realität isch keis Flüüssband. Sobald me s Hirni mues iischalte oder improvisiere, zellt s Resultat nüt me. Es schiint, als würs im grosse Kanton nöd drum gah, gueti Produkt z mache, sondern drum, was ganz gnau i de Stellebeschriibig staht und wer am Schluss d Schuld treit. Und s Geilschte passiert dänn, wänn d Rolle ebe nöd millimetergnau festgleit isch. Dänn wird s «Nöd-Schaffe» zu enere olympische Disziplin und jede definiert sponti sini eignigi Rolle zäme: Überall mit am Tisch sitze zum Bedenke aamälde, aber bi de Frag «Wer machts?» plötzlich unsichtbar wärde. Sich mit Händ und Füess wehre, öppis Handfeschts abzlifere, wil me sich mit echte Resultat ja aagriifbar mache chönnt. D Schnurre gross ufmache bim Chrutze, aber d Händ tüüf i de Hose bhalte. Mer isch ja au nöd «Am Schaffe». Mer isch «e Schnittstell», «en Enabler» oder «en Sparringspartner». Und s Verräcktischte: Lieber mit 120 vorschriftsmässig im Betonpfiiler ins jasse, als einisch unbürokratisch uf d chlötz stah. Hauptsach, me chan nachher im Trümmerfäld staa, und Stolz säge: «Ich habe mich exakt an Prozess 4b gehalten, die Zuständigkeit lag bei XYZ!» Erläbed anderi vo eu die «DIN-konform a d Wand fahre»-Mentalität au? Oder bin ich eifach inere bsunders verstrahlte Konzärn-Höll glandet? submitted by /u/CastAfast
Originally posted by u/CastAfast on r/BUENZLI