TL;DR: Die Fillialä het eus eifach chöne die 6.95.- oder die richtige Lämpli gäh, aber nai, ich han en administrative Wanderzirkus verahstaltet, möglichi resourcä bundä und am schluss no 3.05.- fürschii gmacht. Gschichtliziit. Ich bin wäge 6.95.- zum Bünzli Ändgägner mutiert und ha debi glaubs viel zvill froid gha, als das en erwachsene mänsch eich dörfti ha. Mini Frau hät amne Mittwoch ii de Migros eh Schachtle LED-Spots kauft. Am Abig hämmer den leider festgstellt, das es nöd die richtige sind, zwenig Lumen. Keis Problem, verpackig isch ja no ungöffnet, alli siegel sind no drah, das teil bringemer zrugg. Aso simmer uf dä druff folgendi Samstig us organisatorische gründ ine anderi Migros vo de nachbarsgemeind um die dinger zruggsbringe, sött ja somit eich eh sach vo zwei minute sii. Leider nei, willkomme bi de Migros. Migros us de Nachbarsgmeind het gseit, mer dörf Produkt nur det zrugg gäh wo mers au her hät. Komisch, aber okay. Aso zu de “richtigä” Migros düüst. Ich ha im Auto gwartet, mini Frau isch ie und staht gfühlt 30 sekunde spöter wiider bi mir. “Die nämeds nöd zrugg, seg Verbruchsmaterial” Zur Erinnerig, amne Mittwuch kauft, somit drü Täg alt. Originalverpackt, nöd mal die runde Plastikchläberli sind verschnitte oder entfernt worde, weder hets so ussgseh als hättemer drah umegfingerlet. Ja denn isch de Bünzli so richtig langsam am stiigä gsi, ha mer das böxli gschnappt, de Frau s’Auto gäh und bin selber zu dem Infoschalter marschiert. Also hani denkt, wenn sie scho meint, das nöd bewiise werde cha das mer die schachtle NÖD ufgmacht hend, mach ich ez en garantiefall drus. Ha dere also gseit, das die dinger futsch sind und ich mis Geld zrugg will. Verwirrig, ratlosigkeit, Chefin mun gholt werdä. Nachere churze Tuschelrundi direkt en Meter vor mir, erchlärt mir Chefin, dass es kei Garantie giit. Ez isch min Bünzli so richtig schön uf betriebstemperatur cho und fang halt ah über die Gsetzliche Vorgabe und Gwährleistige zschwurblä, das mer uf praktisch alles eh zweijährigi Garantie hät und das sicher bi FRISCH KAUFTE LÄMPLI zum zug chunt. Sie so: “Nei, mir sind zu gar nix verpflichtet, as OR mun sich d’Migros ii demfall nöd halte und das wäri alles Kulanz und Verbruchsmaterial sowieos nöd… blablabla… Schöne Tag” und lauft eifach weg. Ich stah da, wie bstellt und nöd abgholt, weis ganz genau dasi rächt ha, aber ha kei ahständigi argumentatione aso bringi nur es “Ich verstah scho, werum ihr immer unbeliebter werdet”. Sie no wäret em weglaufe: “Tja, chamer nüüt mache.” Okay… ez bini so richtig hässig, aber no so dasi nöd gad Voll-Karen eskalierä. Dehai hani zerst mal Website vo de Migros studiert und hoblalätz, da giits tatsächlich infos zu Rücknahme, Garantie usw. aso offebar wär die sach doch es biz anderscht als mir Madam Chundefründlichkeit erchlärt hät. Ez chönter mer mal als zwüschestand säge, junge, es gaht um 6.95.- lass es doch guet sii. Aber nei, hüt sind 7 stutz viel gäld und zweitens isch de bünzli ii mir immer no am poltere gsi. Also, was machemer? Ich mun säge, ich bin sälber imne Handelsunternähme tätig, ich känne mich es biz us mit Chundereklamatione. Es wird nämli es Ticket eröffnet. Öper muss das Ticket läse, viilicht wird’s wiitergleitet, denn muss es nomal öper läse, denn muss öper eh massnahm definiere, die massnahm muss duregfüehrt werde, denn muss gäge s’endi eh antwort formuliert, de fall dokumentiert und abgschlosse werdä. Jedi vo dene Schritt chostet Arbetsziit. McKinsey lässt grüssen. Aso hani sicher s’falsche Kontaktformular gno, das mun ja denn ah die richtig stell wiitergleitet werdä, han mit Tschättschitipi ii ungefähr 30 sekunde eh wunderbar ufblähti Beschwerdä mit 9 Pünkt formuliert. Natürli mitem ussdrückliche Wunsch, dass uf jede einzelni Punkt mun iigangä werde und han uf Senden klickt. Es Meisterwerk vomne administrative Schwachsinn. Mis Ziel isch nüm gsi, 6.95.- zrugg zbecho, mis Ziel isch gsi das die 6.95.- dä Migros möglichst chosteintensiv um d’ohrä flüügt. Will jedi Minute, wo öper mit minere Reklamation verbringt, chostet gäld. Jedi wiiterleitig, rückfrag, abklärig. Im idealfall no öper usem Mänätschmänt, während irgendwo en McKinsey-Berater über eh Eckzell Listä luegt. Und falls es KI bearbeitet? Au guet, denn verbrännts wäg mir Toukäns statt arbetsstundä. Nachere Wuche hani eh Antwort becho. Mer entschuldig sich bi mir, das hätti so nöd dörfe passierä. Vo mine 9 pünkt sind nur zwei beantwortet wordä, nöd mal das hetti ehrlich gseit erwartet. Aber ez dä Best, mer hend en 10 Franke Guetschi becho. Ha luut müsse lachä. Mer hend ez also 3.05 meh becho als ursprünglich s’produkt kostet hät. Es giit Unternähme, die wüssed das das alles en riise seich isch. Digitec diskutiert nöd lang umä, da schriebsch en garantiefall bimne 10 Franke produkt und bim abschicke chunsch sofort d’mäldig über das du de seich chasch entsorgä und dis gäld zrugg bechunsch. Aber ich glaub McKinsey het das de Migros irgendwie verpasst z’erchläre. Ich bin mir absolut bewusst, das ich mit minere Aktion au Mitarbeiter beschäftigt han wo persönlich absolut nüüt defür chönd und natürli isches es absoluts chindisches verhalte vor mir. Aber mängsmal gwünnt halt nöd immer d’vernunft, sondern de Bünzli im Chopf. Ich weiss jetzt scho was ich mache wird, wenn mer wieder so was ähnlichs sött passierä. Mängisch sött mer ebe kei schlächti Googlebewertig schriebä sondern eifach mal es Ticket eröffne submitted by /u/babotheone
Originally posted by u/babotheone on r/BUENZLI